अज्ञात रोगबाट आठभन्दा बढीको मृत्यु

गोरखा २३ वैशाख । गोरखा जिल्लाको गुम्दा गाविसमा अज्ञात रोगबाट आज बिहानसम्म आठ जनाको ज्यान गइसकेको छ । सो गाविस वडा नं। १ २ ३ मा विगत दुई हप्तादेखि टाउको दुख्ने ज्वरो आउने खोकी लाग्ने घाँटी दुख्ने जीउ चिलाउने पेटमा डल्लो हिँड्ने पेट दुख्ने लक्षणसहितको रोग देखापरेको छ । गुम्दाको सिङ्ला गाउँ गोरखा सदरमुकामबाट २६ कोष उत्तरमा पर्दछ । सो गाउँमा अहिले दुई जना बिरामी नभएको घर नै छैन । काम गर्दागर्दै बाटोमा हिँड्दाहिँड्दै रोगको लक्षण देखिन गई बिरामी ढल्ने र मर्ने गरेको स्थानीय समाजसेवी बुद्ध गुरुङ र छमबहादुर तमुले बताए ।
अज्ञात रोगले ज्यान लिन थालेको बारे जिल्ला स्वास्थ्य कार्यालय गोरखालाई जानकारी नभएको एक कर्मचारीले बताए । जनसङ्ख्या वृद्धि दर तीव्र रहेको सो ठाउँमा रोगले ज्यान लिन थालेपछि स्थानीयवासी स्वास्थ्य विभागमा तुरुन्तै सो सम्बन्धमा अध्ययन अनुसन्धान गरी उपचारका प्रकि्रया अगाडि बढाउनेमा आशावादी छन् । गुम्दाको अन्य वडा र उदिया गाविसको केही गाउँमा समेत रोगका लक्षण देखिँदै गएको छ । यस रोगबाट दुई हजारभन्दा बढी व्यक्ति प्रभावित भएका छन् ।