यूएईमा फेरि एक नेपालीको मृत्यू

यूएई/रोल्पा जिल्लाको जौकोट घर भै रोजगारीको सिलसिलामा करीब छ महिना अघि यूएई छिरेका अन्दाजी वर्ष २८ का नन्द बहादुर डांगीको गत मिति १७ मई २००९ का दिन साउदी अरेबियाको सीमाना नजिकै यूएईको एक दुर्गम क्षेत्र गयासी भन्ने ठाउंमा कार्यक्षेत्रमा दुर्घटना भै घटनास्थलमै मृत्यू भएको समाचार प्राप्त भएको छ ।समाचारदाता लोक बहादुर गुरुंग र रेवन्तराम अधिकारीका अनुसार रोडमा आफ्नो ड्युटी गरिरहेको बेला कुवेतबाट आएको ट्रेलरले ठक्कर दिएपछि उनको मृत्यू भएको हो । मृतकको घरपरिवारको बारेमा आफूहरु अनभिज्ञ रहेको र उनको शव अहिले कहां छ र कम्पनीले के गरिरहेको छ भन्ने कुरा पनि आफूहरुलाई जानकारी नभएको उनीहरुले बताए । मृतक लगायत अन्य साथीहरु यूएईको टेक्निकल रोड नामक कम्पनीमा उक्त क्षेत्रमा काम गर्दै आइरहेका थिए । उनीहरुका अनुसार मृतकले रोजगारीको सिलसिलामा यसअघि साउदी अरेबिया र कत्तारमा पनि काम गरिसकेका र यूएई उनका लागि तेश्रो रोजगारदाता मुलुक रहेको थियो ।नेपाली समाज यूएई, मुसफाह क्षेत्रीय समितिका अध्यक्ष कृष्णराम अधिकारीले सो मृत्यूको घटनाक्रम जानकारी लिइरहेको अवस्थामा उक्त कम्पनीमा कार्यरत नेपालीहरुले धेरै दुःख पाइरहेको पनि जानकारी हुन आएको छ । नेपालबाट ब्लू स्काई म्यानपावर मार्फत् ने.रु. तीस हजार देखि एकलाख सम्म भुक्तानी गरेर सो कम्पनीमा आएका नेपालीहरुले ड्युटी १२ घण्टा गर्नुपर्ने र खाना खाएर ३००/- दिर्हाम्स भन्दा नबच्ने गुनासो पनि पोखेका छन् । कार्यक्षेत्र अत्यन्तै कठीन र पञ्जा, जुत्ता, हेल्मेट जस्ता सेफ्टीका सामानहरु समेत कम्पनीले उपलब्ध नगराएको कुरा पीडितहरुलाई उद्घृत गर्दै कृष्णराम अधिकारीले बताउंछन् ।गत ०४ मई २००९ का दिन मुसफाहमा मगन चौधरीको आकस्मिक मृत्यू भएको समाचार नसेलाउंदै ०८ मई २००९ का दिन दुबईमा अर्जुन पोखरेलको करेन्ट लागेर मृत्यू भएको खबर आएको थियो । यस महिनाको करीब १५ दिनको अन्तरालमा यूएईमा तीनजना नेपालीको मृत्यूको सनाखत भैसकेको छ । नेपालको बढ्दो बेरोजगारीको समस्या तथा कमजोर पारिवारिक अवस्थाका कारण आफ्नो सुखी जीवन बिताउंने अभिलाषाले यूएई भित्रिएका नेपालीहरुको विभिन्न कारणले मृत्यूको लहर यूएईमा ज्यादै नै बढेको हुंदा यहां जीवनको कुनै भरोसा नभएको आभास पनि हुन थालेको छ ।