एकै गाविसका दुई विद्यालय बन्द

तनहुँ १६ जेठ । जिल्लाको दक्षिण भेगमा पर्ने ढोरफिर्दो गाविसस्थित दुई विद्यालय अनिश्चितकालका लागि बन्द गरिएको छ । ढोरफिर्दो-१ गर्दुमस्थित शारदा प्राथमिक विद्यालय र सोही गाविस-४ स्थित छाब्दी माध्यमिक विद्यालय बन्द गरिएको हो । उक्त विद्यालयका सबै विद्यार्थी विरामी परेपछि अभिभावकहरुको सल्लाहबाट नै विद्यालय बन्द गरिएको शारदा प्राविका प्रधानाध्यापक निर्मल पौडेलले बताउनुभयो ।
उहाँका अनुसार शारदा प्राविका ५६ र छाब्दी माविका ३१० गरी ३६६ विद्यार्थी विरामी परेका छन् । विद्यार्थीहरुलाई रुघाखोकी लाग्नुका साथै ज्वरो आउने र टाउको दुःख्ने रोग देखा परेको ढोरफिर्दो उपस्वास्थ्य चौकीका अहेव भीमसेन साहले बताउनुभयो । एक्कासि भएको मौसमी परिवर्तनले भाइरल फिवर रोग देखा परेको हो । सात दिन भित्र आफै निको हुने दमौली अस्पतालका डा। सुशीलनाथ प्याकुरेले बताउनुभयो । उहाँले थप्नुभयो - स्वास्थ्यकर्मी समयमै चनाखो हुँदा सो रोग फैलिन नपाएको हो।